Жакында Кыргызстандын президенти Садыр Жапаров Ысык-Көлдүн жээгинде ыктыярдуу таштанды чогултуп жүрүүсү менен белгилүү болгон эко активист Андрей Панаев менен жолугушту. Интернеттен Андрей жөнүндө билген Садыр Жапаров жеке өзү ыраазычылык билдирүү маанилүү деп эсептеди.
«Сиздин ишиңиз көптөр үчүн үлгү болуп жатат. Экологиянын жана табияттын чек арасы жок. Бүткүл дүйнө бир аба менен дем алат. Ошондуктан Жер бетиндеги ар бир адам сиздей иш кылышы керек», — деп белгиледи Садыр Жапаров.
Кыргызстандын элинин атынан, волонтерлордун жана эко активисттердин атынан президент белек катары ички өндүрүштүн автоунаасын тапшырды.
Эки күндөн кийин, 27-августта, Садыр Жапаров «Кумтор Голд Компани» ишканасында жер астынан алтын казуу долбоорунун баштоосун берди.
«Кумтордо жер астынан алтын казуу — бул айлана-чөйрөнү коргоо жана бүгүнкү күнгө чейин аман калган муздуктарыбызды сактоо үчүн маанилүү кадам», — деп баса белгиледи мамлекет башчысы.
Ал бул иш 20 жыл мурда эле башталышы керек болгонун, бирок жер астынан алтын казуунун ордуна чет өлкө компаниясы мурунку бийлик жана коррупциялуу кызмат адамдары менен жашыруун келишип, арзаныраак жана жөнөкөй вариантты — ачык карьерди тандап, муздуктарды жок кылганын белгиледи.
Бул эки окуяны бир маанилүү тема — айлана-чөйрөгө камкордук жана Кыргызстандын табигый байлыгын коргоо байланыштырары шексиз. Кыргызстандын президенти табиятка каршы болгон ар кандай кол салууга жана анын булганышына жан ачыганын баары билет. Баары Садыр Жапаровдун тоолордон жана Ысык-Көлдүн жээгинен эс алуучулар калтырган таштандыны жеке өзү чогултканын видеодон көрүштү.
Айлана-чөйрөнүн булганышына каршы күрөш — бул экологиянын гана эмес, жарандардын маданиятынын жана аң-сезиминин көрсөткүчү деп ал үчүнчү Эл курултайында айткан.
«Айлана-чөйрөнүн булганышы — бул өзүнө, өз элине жана Кыргызстандын табиятына урматсыздык. Өлкөнүн тазалыгы тазалоодон эмес, биздин аң-сезимибизден башталат. Биздин жүрөктөрүбүздө Мекенге, анын табиятына жана өзүбүзгө урмат бекемделиши керек. Ушул жол менен гана биз республикабызды келечек муундар үчүн таза сактай алабыз», — деп баса белгиледи президент.
